سان فرانسکو: دنیا کے سب سے زیادہ استعمال ہونے والے سرچ انجن گوگل نے دس ہزار ملازمتیں فراہم کرنے کے مواقع پیدا کرنے کا اعلان کردیا ہے۔
عالمی میڈیا رپورٹس کے مطابق گوگل نے وقت کے ساتھ ساتھ خود میں بہت تبدیلیاں پیدا کرلی ہیں اور اب چند روز قبل گوگل نے امریکی مارکیٹ میں ایک سال کے دوران 7 ارب ڈالرز سے زائد کی سرمایہ کاری کرنے کا اعلان کردیا ہے۔
رپورٹ کے مطابق امریکی عوامی ادارہ گوگل کے چیف ایگزیکٹیو آفیسر سندر پچائی کا اس حوالے سے کہنا تھا کہ ’ امریکا میں رواں سال اس سرمایہ کاری کے بعد کم از کم 10 ہزار سے زائد ملازمتوں کے مواقع پیدا ہوں گے‘۔
انہوں نے بتایا کہ دنیا میں سب سے ذیادہ استعمال ہونے والے سرچ انجن گوگل کی طرف سے یہ سرمایہ کاری معیشت کی بحالی کے لیے کی جارہی ہے۔ دوسری جانب گوگل کے سربراہ نے یہ بھی بتایا کہ یہ سرمایہ کاری ٹیکنالوجی کے شعبے میں کی جارہی ہے۔
سندر پچائی نے بتایا کہ ہم یہ عملی اقدامات امریکی معیشت میں بحالی کے لیے کررہے ہیں، جس سے اب 19 ریاستوں میں نئی کمپنیاں بھی کھولی جائیں گی۔
ان کا کہنا تھا کہ امریکی ریاست کیلی فورنیا اور سان فرانسسکو میں ایک ارب ڈالرز کی سرمایہ کاری کرنے کا فیصلہ کرلیا گیا ہے۔