کیلفورنیا: سوشل میڈیا ایپ انسٹاگرام میں آئے روز نت نئے فیچرز کی آزمائش کی جارہی ہے اور ہر فیچر کولانچ کیے جانے سے پہلے محدود صارفین کو اس کی آزمائش کا سامنا کرنا پڑتا ہے۔
عالمی میڈیا رپورٹس کے مطابق حال ہی میں صارفین میں تصاویر شئیر کرنے کے لیے مقبول ترین ایپ انسٹاگرام اپنے ایک نئے فیچر کو لانچ کرنے سے قبل اس کی آزمائش ہی کر رہی تھی کہ اس دوران ایپ میں بڑی خرابی دیکھنے میں آگئی اور یہ آزمائش پہلی بار محدود صارفین کے بجائے متعدد صارفین کے اکاؤنٹس میں ہونا شروع ہو گئی۔
کمپنی پوسٹوں پر لائیکس کی تعداد چھپانے کے لیے آزمائش کررہی تھی اور اسی دوران متعدد صارفین کے اکاؤنٹس میں خرابی کی وجہ سے پوسٹوں پر لائیکس کی تعداد چھپ گئی۔
We've been testing a new experience to hide likes on Feed posts. We unintentionally added more people to the test today, which was a bug — we’re fixing this issue and restoring like counts to those people as soon as possible.
— Instagram Comms (@InstagramComms) March 3, 2021
کچھ وقت کی آزمائش کے بعد کمپنی کی جانب سے بیان جاری کیا گیا کہ ایسا جان بوجھ کر نہیں کیا گیا اور ہم اسے جلد از جلد ٹھیک کرنے کی کوشش کر رہے ہیں جس کے بعد صارفین کو ان کی پوسٹوں کے لائیکس واپس نظر آنا شروع ہو جائیں گے۔
واضح رہے کہ انسٹاگرام نے گزشتہ ایک سال قبل 2019 میں لائیکس کو پوشیدہ رکھنے کے فیچر کی آزمائش کی شروعات کی تھی۔
کمپنی کا اپنے بیان میں کہنا تھا کہ لائیکس کی تعداد کو پوشیدہ کرنے کا مقصد صرف یہ ہے کہ انسٹاگرام پر آپ کے فالورز اس بات پر زیادہ نظر رکھیں کہ آپ نے کیا شیئر کیا ہے، نہ کہ ان کی نظر اس بات پر ہو کہ آپ کی پوسٹ پر اب تک کتنے لائیکس آرہے ہیں۔
کمپنی نے یہ بھی واضح کیا تھا کہ اس تبدیلی کا اصل مقصد سوشل میڈیا پر موجود تمام صارفین کو اس دباؤ سے نکالنا ہے کہ ان کی پوسٹ پر کتنے لائیکس آرہے ہیں جب کہ لائیکس کی تعداد میں دوسرے صارفین سے موازنہ کرنے کی وجہ سے بھی یہ تجربہ کیا جارہا ہے۔