کابل: افغان دارلحکومت کابل میں یکے بعد دیگرے تین دھماکوں کے نتیجے میں پانچ افراد ہلاک جبکہ چار افراد زخمی ہوئے ہیں۔
افغان میڈٰیا کے مطابق تینوں دھماکوں میں تین کاروں کو نشانہ بنایا گیا۔ ان کاروں میں شہری سوار تھے جن میں ایک خاتون اور بچے بھی شامل تھے۔
میڈیا رپورٹس کے مطابق پہلا دھماکا دارالامن روڈ پر ہوا جس میں کسی بھی ہلاکت کی اطلاع نہیں ہے تاہم اس دھماکے میں دو افراد زخمی ہوئے ہیں جن میں سے ایک کی حالت تشویشناک ہے۔
دوسرا دھماکا کابل کے علاقے کارتہ پروان میں ہوا جس کےنتیجے میں ایک خاتون سمیت 3 افراد ہلاک ہوگئے ہیں۔
تیسرے دھماکے میں 2 افراد ہلاک جبکہ 2زخمی ہوئے ہیں۔ اس دھماکے میں بھی کرولا کار کو نشانہ بنایا گیا۔ مقامی پولیس نے ان تین دھماکوں کو ٹارگٹ کلنگ کا نام دیا ہے جبکہ ان کی تفتیش کا سلسلہ جاری ہے۔
خیال رہے کہ افغان حکومت اور طالبان کے درمیان مذاکرات پر ابھی کوئی پیشرفت نہیں ہوسکی۔