واشنگٹن: امریکا نے حوثیوں باغیوں کا نام دہشتگرد تنظیموں کی فہرست سے خارج کردیا ہے۔
غیر ملکی خبررساں ایجنسی کے مطابق منگل کے دن حوثی باغیوں کا نام دہشتگردوں کی فہرست سے نکال دیا جائے گا جبکہ حوثی باغیوں کے تین رہنما عبدالخالق بدر الدین، عبداللہ الحکیم اور عبدالملک الحوثی پر پابندیاں برقرار رکھی جائیں گی۔
امریکی سیکریٹری خارجہ انتونی بلینکن کا کہنا ہے کہ حوثی باغیوں کا نام دہشت گرد تنظیموں کی فہرست سے خارج کرنے کا مقصد انسانیت نواز کوشش کو فروغ دینا ہے۔
ان کا کہنا تھا کہ حوثیوں کو دہشت گرد قرار دینے والے فیصلے کو منسوخ کر کے اس بات کو یقینی بنایا جائے گا کہ بدترین انسانی بحران کے شکار لوگوں تک امدادی سامان کی ترسیل میں کسی بھی قسم کی کوئی رکاوٹ پیدا نہ ہو۔