تورنگا: پاکستان کرکٹ ٹیم کے آل راؤنڈر شاداب خان نیوزی لینڈ کے خلاف پہلے ٹیسٹ میچ سے باہر ہوگئے ہیں جبکہ ان کی جگہ ظفر گوہر کو ٹیم کا حصہ بنالیا گیا ہے۔
تفصیلات کے مطابق شاداب خان نے نیوزی لینڈ کے خلاف کھیلے گئے تیسرے ٹی ٹونٹی میچ کے بعد اپنی بائیں ٹانگ میں تکلیف کی شکایت کی ۔ میچ میں پاکستان نے 4 وکٹوں سے کامیابی حاصل کی تھی۔
شاداب خان کا ایم آر آئی سکین کل تورنگا میں کروایا جائے گا، جس کی رپورٹ کے بعد ہی ان کی انجری کی اصل نوعیت سامنے آئے گی کہ انہیں کرکٹ میں واپسی کے لیے کتنا وقت درکار ہے۔
شاداب خان چھبیس سے تیس دسمبر تک ماؤنٹ منگنوئی میں شیڈول نیوزی لینڈ کے خلاف پہلے ٹیسٹ میچ کے لیے دستیاب نہیں ہیں، لہٰذا ٹیم منیجمنٹ نے ظفر گوہر کو بطور متبادل سپنر پہلے ٹیسٹ میچ کے لیے قومی ٹیسٹ سکواڈ میں شامل کرلیا ہے۔ ظفر گوہر نے ہملٹن سے بذریعہ بس قومی ٹیسٹ سکواڈ کو تورنگامیں جوائن کرلیا ہے۔
.@babarazam258 and @ImamUlHaq12 are on their road to recovery before the start of the Test series against New Zealand.#NZvPAK #HarHaalMainCricket #BackTheBoysInGreen pic.twitter.com/fCNFPSjhMb
— Pakistan Cricket (@TheRealPCB) December 23, 2020
یاد رہے کہ ظفر گوہر ابتدائی طور پر پاکستان شاہینز کے سکواڈ کا حصہ تھے اور انہوں نے گزشتہ سال کھیلی گئی قائداعظم ٹرافی میں بہترین کارکردگی کا مظاہرہ کیا تھا۔
سنٹرل پنجاب کی نمائندگی کرنے والے سپنر نے ٹورنامنٹ میں 38 وکٹیں حاصل کی تھیں، وہ ایونٹ میں سب سے زیادہ وکٹیں حاصل کرنے والے باؤلرز کی فہرست میں تیسرے نمبر پر تھے۔
رواں سال نیشنل ٹی ٹونٹی کپ میں ظفر گوہر نے مجموعی طور پر 8 وکٹیں حاصل کی تھیں تاہم وہ قائداعظم ٹرافی میں شرکت نہیں کرسکے تھے۔پچیس سالہ سپنر اب تک 39 فرسٹ کلاس میچوں میں 144 وکٹیں حاصل کرچکے ہیں، وہ 6 مرتبہ ایک اننگز میں 5 جبکہ 2 مرتبہ میچ میں 10 وکٹیں اپنے نام کرچکے ہیں۔
پاکستان کا نیا ٹیسٹ سکواڈ جن کھلاڑیوں پر مشتمل ہے ان میں محمد رضوان پہلے ٹیسٹ میچ کے لیے کپتان ہونگے جبکہ سرفراز احمد، ظفر گوہر، عابد علی، اظہرعلی، شان مسعود، فواد عالم، سہیل خان، یاسر شاہ، محمد عباس، عمران بٹ، حارث سہیل، نسیم شاہ، شاہین شاہ آفریدی اور فہیم اشرف شامل ہیں، بابراعظم، امام الحق اور شاداب خان انجری کے باعث پہلا ٹیسٹ میچ نہیں کھیلیں گے۔
پاکستان شاہینز کا نیا سکواڈ جن کھلاڑیوں پر مشتمل ہے ان میں روحیل نذیر کپتان اور وکٹ کیپر کے فرائض انجام دینگے جبکہ دیگر میں حیدر علی،ذیشان ملک، عماد بٹ، دانش عزیز، افتخار احمد، خوشدل شاہ،حسین طلعت، محمد حسنین، حارث رؤف، عثمان قادر،وہاب ریاض، موسیٰ خان اور عبداللہ شفیق شامل ہیں۔
شیڈول کے مطابق 26 تا 30دسمبرپاکستان اور نیوزی لینڈ کے مابین پہلا ٹیسٹ میچ ماؤنٹ منگنوئی کے مقام پر کھیلا جائے گاجبکہ 27دسمبر کو پاکستان شاہینز کا پہلا ٹی ٹونٹی میچ ناردرن نائٹس کے خلاف کھیلا جائے گا جوکہ ہملٹن میں کھیلا جائے گا۔
29دسمبر کو پاکستان شاہینز کا دوسرا ٹی ٹونٹی میچ ویلنگٹن فائر برڈز کے خلاف ویلنگٹن میں کھیلا جائے گا۔
یکم جنوری کو پاکستان شاہینز کا تیسرا ٹی ٹونٹی میچ کینٹر بری کے خلاف لنکن میں ہوگا جبکہ 3تا 7 جنوری پاکستان اور نیوزی لینڈ کے مابین دوسرا ٹیسٹ میچ کرائسٹ چر چ میں کھیلا جائے گا۔
3جنوری کو پاکستان شاہینز کا چوتھا ٹی ٹونٹی میچ نیوزی لینڈ الیون،5جنوری کو پاکستان شاہینز کا پانچواں ٹی ٹونٹی میچ نیوزی لینڈ الیون کے خلاف کھیلا جائے گا ، جبکہ پاکستان شاہینز کا سکواڈ 7 جنوری جبکہ قومی ٹیسٹ سکواڈ 9 جنوری کو پاکستان روانہ ہوگا۔
واضح رہے کہ پاکستانی سکواڈ نیوزی لینڈ کے خلاف پہلے ٹیسٹ میچ کیلئے تورنگا پہنچ چکا ہے اور جہاں پر قومی ٹیم نے ٹریننگ کا بھی آغاز کردیا ہے۔
Pakistan team reaches Tauranga! ?#NZvPAK #HarHaalMainCricket #BackTheBoysInGreen pic.twitter.com/G4bjtZV1fD
— Pakistan Cricket (@TheRealPCB) December 23, 2020
قبل ازیں پاکستان کو نیوزی لینڈ کے ہاتھوں تین ٹی 20میچوں کی سیریز میں 1-2سے شکست کا سامنا کرنا پڑا تھا۔