ماسکو: سماجی رابطے کی ویب سائٹ ٹویٹر کو روس نے ایک ماہ میں ممنوعہ مواد نہ ہٹانے پر ملک بھر میں ویب سائٹ بند کرنے کی دھمکی دے دی ہے۔
عالمی میڈیا رپورٹس کے مطابق گزشتہ ہفتے روس نے ویب سائٹ سے ممنوعہ مواد نہ ہٹانے پر سماجی رابطے کی ویب سائٹ ٹویٹر کی رفتار کم کردی تھی۔
رپورٹ کے مطابق روسی مواصلاتی واچ ڈاگ روسکو مناڈزور کے ڈپٹی ہیڈ وڈیم سبوٹن نے کہا ہے کہ ٹویٹر کی جانب سے اس مطالبے پر ابھی تک کوئی ردعمل سامنے نہیں آیا تاہم ایک ماہ میں ممنوعہ مواد نہیں ہٹایا گیا تو پورے ملک میں ویب سائٹ بند کردی جائے گی۔
انہوں نے کہا کہ ٹوئٹر انتظامیہ کو ہماری درخواستوں پر توجہ دینی چائیے لیکن وہ نہیں دے رہی۔ اگر مسلسل یہی سلسلہ برقرار رہتا ہے تو اسے عدالت کے حکم کے بغیر ہی ایک ماہ کے اندر بند کردیں گے۔
وڈیم سبوٹن نے کہا کہ اگر ٹویٹر بچوں سے متعلق فحش مواد، غیر قانونی منشیات اور بچوں کے خود کشی سے متعلق مواد کو ہٹادے گا تو ہماری جانب سے اسے بلاک نہیں کیا جائے گا۔
واضح رہے کہ اس سے قبل روس کے سرکاری کمیونی کیشن ریگولیٹر نے اس حوالے سے آگاہ کیا تھا کہ ویب سائٹ سے ممنوعہ مواد نہ ہٹائے جانے پر ٹویٹر کی رفتار کم کردی گئی ہے۔