واشنگٹن: ایران سے متعلق اسرائیلی اور امریکی اعلی عہدیداروں کی پہلی میٹنگ ہوئی ہے۔
غیر ملکی خبر رساں ایجنسی کے مطابق دونوں ممالک کے اعلی عہدیداروں نے اس پہلی ملاقات میں مشرق وسطی میں درپیش سکیورٹی چیلنجز پر تبادلہ خیال کیا جس کا مرکز ایران تھا۔
اس میٹنگ میں ایران کو جوہری ہتھیاروں کی تیاری سے روکنے سے متعلق ایرانی جوہری معاہدے میں امریکا کے دوبارہ شامل ہونے پر بھی تبادلہ خیال کیا گیا۔
وائٹ ہاوس کی قومی سلامتی کونسل کی ترجمان ایملی ہورن نے امریکی اور اسرائیلی عہدیداروں کے درمیان ہونے والی اس ملاقات پر بات کرتے ہوئے کہا ہے کہ دوران فریقین نے علاقائی سلامتی پر پائے جانے والے خطرات سے ایک دوسرے کو آگاہ کیا۔
اس دوران دونوں ممالک نے ایران پر بات کرتے ہوئے ایک دوسرے کے ساتھ مل کر مقابلہ کرنے کے اپنے عزائم کا اظہار کیا۔
خیال رہے کہ یہ ملاقات ایسے وقت ہوئی ہے جب امریکی انتظامیہ ایران کے ساتھ جوہری معاہدے میں دوبارہ شمولیت کے امکانات پر غور کر رہی ہے۔