بیجنگ: (این پی جی میڈیا) چین نے بین الاقوامی سطح پر سفر کرنے والے چینی شہریوں کے لئے ہیلتھ سرٹیفکیٹ پروگرام شروع کردیا ہے ، جسے “وائرس پاسپورٹ” کا نام دیا گیا ہے اور چین وائرس پاسپورٹ جاری کرنے والا دنیا کا پہلا ملک بن گیا ہے۔
غیرملکی خبر رساں ایجنسی کے مطابق چین کا یہ پاسپورٹ ہیلتھ سرٹیفکیٹ کے طرز پر تیار کیا گیا ہے جس میں مسافر کے کورونا ٹیسٹ، ویکسینیشن اور ضروری طبی معلومات درج ہونگی۔
تفصیلات کے مطابق چینی وزارت خارجہ کے ترجمان کا کہنا ہے کہ یہ سرٹیفیکیٹ عالمی معاشی بحالی کو فروغ دینے اور سرحد پار سفر کو آسان بنانے کے لئے تیار کیا جارہا ہے۔
زرائع کے مطابق چین میں بیرون ملک سے داخل ہونے یا باہر جانے کے لیے وائرس پاسپورٹ دکھانا ہوگا لیکن ابھی یہ لازمی نہیں اور صرف چینی شہریوں پر لاگو ہوگا۔
خیال رہے کہ بحرین پہلے ہی "ویکسین پاسپورٹ” متعارف کرواچکا ہے اور امریکہ اور برطانیہ ایسے ممالک میں شامل ہیں جو بھی اسی طرح کے اجازت نامے پر عمل درآمد کرنے پر غور کر رہے ہیں۔
علاوہ ازیں یورپی یونین ایک ویکسین “گرین پاس” پر بھی کام کر رہی ہے جس سے شہریوں کو ممبر ممالک اور بیرون ملک سفر کرنے کا موقع ملے گا۔