کراچی (این پی جی میڈیا )پاکستان اور جنوبی افریقہ کے مابین 2ٹیسٹ میچوں کی سیریز کا پہلا میچ منگل سے نیشنل سٹیڈیم کراچی میں کھیلا جائے گا۔جنوبی افریقہ کی کرکٹ ٹیم 14برس بعد پاکستان کی سرزمین پر ٹیسٹ میچ کھیلے گی، پہلے ٹیسٹ میچ کیلئے17 رکنی قومی ٹیسٹ اسکواڈ کا اعلان کردیا گیا ہے ،کپتان بابر اعظم ہیڈ کوچ کی مشاورت سے میچ کیلئے پلیئنگ الیون کا انتخاب کریں گے،پہلے ٹیسٹ سے قبل دونوں ٹیموں کی بھرپور ٹریننگ جاری ہے،قومی ٹیم نے بیٹنگ ،بائولنگ اور فیلڈنگ کی مشقیں کیں۔
Pakistan and @OfficialCSA team training session at the NSK!#PAKvSA #HarHaalMainCricket pic.twitter.com/Ykq5kZNT3E
— Pakistan Cricket (@TheRealPCB) January 24, 2021
تفصیلات کے مطابق قومی کرکٹ ٹیم کے سلیکٹرز نے جنوبی افریقہ کے خلاف پہلے ٹیسٹ میچ کے لیے سترہ رکنی قومی ٹیسٹ اسکواڈ کا اعلان کردیا ہے. بیس رکنی ابتدائی اسکواڈ کی ٹریننگ کا سلسلہ جاری رہے گا ۔دونوں ٹیموں کے مابین دو ٹیسٹ میچوں پر مشتمل سیریز کا پہلا میچ 26 جنوری سے نیشنل اسٹیڈیم کراچی میں شروع ہوگا۔
پہلے ٹیسٹ کیلئے اعلان کردہ سترہ کھلاڑیوں پر مشتمل اسکواڈ میں اوپنرزعابد علی، عمران بٹ ،مڈل آرڈر بیٹسمین: اظہر علی ، بابر اعظم (کپتان) ، فواد عالم اور سعود شکیل ،آلراؤنڈرزفہیم اشرف ، محمد نواز،وکٹ کیپرز محمد رضوان (نائب کپتان)، سرفراز احمد،اسپنرز نعمان علی ، ساجد خان ، یاسر شاہ، فاسٹ باؤلرز حارث رؤف ، حسن علی ، شاہین شاہ آفریدی اور تابش خان شامل ہیں۔دوسری جانب نیشنل اسٹیڈیم کراچی میں پاکستان اور جنوبی افریقا کی ٹیموں کا پریکٹس سیشن جاری ہے۔
دونوں ٹیمیں منگل سے شروع ہونے والے ٹیسٹ کیلئے بھرپور تیاریوں میں مصروف ہیں۔لیگ اسپنر یاسر شاہ کی ثقلین مشتاق کی نگرانی میں ٹریننگ چل رہی ہے تو دوسری جانب شاہین شاہ اور حسن علی نئی گیند سے بولنگ پریکٹس کر رہے ہیں۔وکٹ کیپر رضوان اور سرفراز نے ایک دوسرے کو ایجز پر کیچ کی پریکٹس کروائی، جبکہ اظہر علی کی نیٹس پر نئی گیند سے بیٹنگ پریکٹس بھی جاری ہے۔
دوسری جانب دونوں ٹیموں کے مابین ابھی تک کھیلے گئے ٹیسٹ میچوں میں مہمان ٹیم کو واضح برتری حاصل ہے،پاکستان اور جنوبی افریقہ کے مابین ابھی تک26ٹیسٹ کھیلے جا چکے ہیں جن میں 15میچوں میں جنوبی افریقہ جبکہ صرف4میچوں میں پاکستان نے فتح حاصل کی جبکہ7میچ ڈرا ہوئے۔پاکستان میں دونوں ٹیموں کے مابین7ٹیسٹ کھیلے گئے جس میں 4میچ ڈرا جبکہ جنوبی افریقہ نے2،پاکستان نے 1میچ میں فتح حاصل کی۔