اسلام آباد: قومی کرکٹ ٹیم کے سابق کپتان اور فاسٹ بالر وسیم اکرم نے کورونا ایس او پیز پر عمل نہ کرنے والوں کی چھترول کرنے کا مشورہ دے دیا ہے۔
میڈیا رپورٹس کے مطابق دنیائے کرکٹ میں بالنگ کے شہنشاہ وسیم اکرم نے کورونا ایس او پیز پر عمل نہ کرنے والوں کا علاج ڈھونڈ لیا ہے چونکہ ان کا کہنا ہے کہ لوگ ڈھیٹ ہوگئے ہیں سیدھی بات نہیں مانتے۔
وسیم اکرم نے کورونا ایس او پیز پر عمل نہ کرنے والوں کے لیے پلان بی کا مشورہ دیا ہے جس کے مطابق ماسک نہ پہننے والوں کی چھترول کی جائے۔
انہوں نے یہ مشورہ سماجی رابطے کی ویب سائٹ انسٹاگرام پر مخصوص انداز میں اپنے ایک ویڈیو پیغام کے ذریعے دیا۔
سوئنگ کے سلطان کا ویڈیو پیغام میں کہنا تھا کہ ماسک نہ پہننے والوں کی چھترول کی جائے کیونکہ یہ لوگ ڈھیٹ ہوگئے ہیں نارمل بات تو کبھی مانتے نہیں ہیں۔
ویڈیو میں کورونا سے متعلق بات کرتے ہوئے ان کا مزید کہنا تھا کہ بہت عرصے بعد آپ سب سے بات ہورہی ہے، میں ٹھیک ہوں اور امید کرتا ہوں آپ سب بھی خیریت سے ہوں گے۔
انہوں نے کہا کہ پنجاب میں کورونا کی تیسری لہرزور پکڑ رہی ہے اس لیے میری آپ سب سے گزارش ہے کہ کورونا ایس او پیز پر عمل کریں۔
خیال رہے کہ کورونا کی تیسری لہر شدت اختیار کررہی ہے اس دوران ملک میں کورونا کے فعال کیسز کی تعداد 42 ہزار 384 تک پہنچ چکی ہے جس کی وجہ سے مستقبل میں مزید پابندیاں لگانے کی توقع ظاہر کی جارہی ہے۔