سری نگر: مقبوضہ وادی کشمیرمیں بھارتی فوجی قافلے پر حملے میں 3 اہلکار ہلاک جبکہ کئی زخمی ہوگئے ہیں۔
غیر ملکی خبررساں ایجنسی کے مطابق مقبوضہ کشمیر کے علاقے سری نگر میں بھارتی فوجیوں کا ایک دستہ اپنی ڈیوٹی کررہا تھا کہ اس دوران نا معلوم مسلح افراد نے ان پر فائر کھول دیا جس کے باعث بھارتی فوج کے کئی اہلکار زخمی ہو گئے۔
میڈٰیا رپورٹس کے مطابق زخمی اہلکاروں کو فوری طبی امداد کے لیے ہسپتال منتقل کیا گیا جہاں تین اہلکاروں نے دم توڑ دیا جبکہ زخمی ہونے والے دیگر اہلکاروں کا علاج جاری ہے۔
بھارتی میڈیا کا کہنا ہے کہ حملے کے نتیجے میں ہلاک ہونے والے اہلکار ہر روز کی طرح معمول کے گشت پر تھے جب یہ واقعہ پیش آیا۔ میڈٰیا نے بتایا کہ ان کا تعلق سینٹرل ریزرو پولیس فورس سے تھا۔
واقعے کے بعد علاقے کو گھیرے میں لے کر حملہ آوروں کی تلاش کے لیے سرچ آپریشن شروع کردیا گیا ہے۔