اسلام آباد: وفاقی وزیر توانائی عمر ایوب نے کہا ہے کہ دہلی میں کسان احتجاج کرنے پر مجبور ہیں جبکہ اسلام آباد میں سیاحت کا فروغ جاری ہے ۔ پاکستان میں شعبہ سیاحت کے فروغ سے معیشت مستحکم ہوگی ۔
ایک تقریب سے خطاب کرتے ہوئے عمر ایوب نے کہا کہ پاکستان میں سیاحتی فیسٹیول کا انعقاد بڑی تبدیلی ہے ، ٹورازم فیسٹول کے انعقاد سے دنیا میں پاکستان کا مثبت تشخص اجاگر ہوا ۔ انہوں نے کہا کہ مسلح افواج اور وفاقی وزرا نے فیسٹیول میں بھرپور تعاون کیا ، اداروں کے باہمی تعاون سے ایونٹ کا کامیاب انعقاد ممکن ہوا ۔
وفاقی وزیر نے کہا کہ ایونٹ کی کامیابی میں نجی شعبے نے بھی اہم کردار ادا کیا ۔ نجی سیکرٹر کی شعبہ سیاحت میں سرمایہ کاری خوش آئند ہے ۔ پاکستان کے مختلف شہروں میں سیاحتی مقامات کی کثیر تعداد موجود ہے ، پاکستان کے ہر شہر میں خوبصورت مناظر نظر آتے ہیں ۔ پاکستان میں تاریخی ورثہ تقریباً ہر شہر میں موجود ہے ، ایڈونچر ٹورازم میں لوگ بڑی تعداد میں شرکت کرتے ہیں ۔
عمر ایوب نے کہا کہ پوری دنیا میں سیاحت ایک منافع بخش کاروبار کی حیثیت رکھتا ہے ، بھارت نے پاکستان کو ہر فورم پر بدنام کرنے کی کوشش کی ، پاکستان نے ہر فورم پر بھارت کو منہ توڑ جواب دیا ہے ، پاکستان بھارت کو بھرپور جواب دینے کی صلاحیت رکھتا ہے ۔
انہوں نے کہا کہ پاکستان میں موسم سرما اور گرما میں دنیا بھر سے سیاح آتے ہیں ، پاکستانی لوگ کھیلوں سمیت تفریح کے تمام مواقع میں بھرپور شرکت کرتے ہیں ۔ پیرا گلائیڈنگ اور اسکائی ڈائیونگ کو عام کریں گے ۔
وفاقی وزیر نے کہا کہ سیاحت سے چھوٹے کاروبار کو فروغ ملے گا ، کوہ پیمائی کا شوق رکھنے والے آگے آئیں اور اپنا لوہا منوائیں ۔ انہوں نے کہا کہ عالمی سطح پر پاکستان کا مثبت تشخص اجاگر کرنے کی ضرورت ہے ، حکومت پاکستان کا مثبت تشخص اجاگر کرنے کیلئے کام کر رہی ہے ۔ وزیراعظم ہر شعبے میں تبدیلی لانے کیلئے کوشاں ہیں ۔
انہوں نے کہا کہ پاکستان کی نوجوان نسل انتہائی باصلاحیت ہے ، وزیراعظم نے نوجوانوں کیلئے مختلف شعبوں میں جدید سہولتیں متعارف کرائیں ۔