ہماری پارٹی کے 16 ارکان نے پیسے لے کر اپنا ووٹ بیچا: عمران خان

اسلام آباد: وزیراعظم عمران خان نے پارلیمانی پارٹی میں گفتگو کرتے ہوئے انکشاف کیا کہ ہماری پارٹی کے 16 ارکان نے پیسے لے کر اپنا ووٹ اپوزیشن کو بیچا۔
وزیراعظم عمران خان نے کہا کہ ایک مقصد کے تحت سیاست میں آیا اور میرا یقین جمہوریت پر ہے ۔ انہوں نے کہا کہ جس کو مجھ پر اعتماد نہیں وہ کھل کر بتا دے ، کوئی مجھے بلیک میل کر کے اپنی بات نہیں منوا سکتا ۔
عمران خان نے کہا کہ میرا مقصد اقتدار نہیں ، عوام کی فلاح ہے ۔ شفاف نظام کی تبدیلی کے لیے کوشش کر رہا ہوں ، اداروں میں شفافیت یقینی بنانے کے لیے جدوجہد جاری رہے گی ۔
خیال رہے کہ حکومت نے قومی اسمبلی کے خصوصی اجلاس کیلئے حکمت عملی طے کرلی اور تمام ارکان اسمبلی کو کل ہر صورت قومی اسمبلی اجلاس میں شرکت کی ہدایت کر دی ہے ۔
واضح رہے کہ ایم کیو ایم کے بعد مسلم لیگ ق نے بھی وزیر اعظم کو اعتماد کا ووٹ دینے کا اعلان کر دیا ہے ۔ اس حوالے سے پی ٹی آئی کا کہنا ہے کہ عمران خان کو تمام اتحادی جماعتوں کی جانب سے اعتماد کا ووٹ دیا جائے گا ۔