اسلام آباد: وزیراعظم عمران خان کی زیر صدارت تحریک انصاف کی پارلیمانی پارٹی کا اجلاس شروع ، پارلیمانی پارٹی کے اجلاس میں اتحادی جماعتوں کے ارکان بھی شریک ہیں ۔
وزیراعظم عمران خان پارلیمانی پارٹی کے اجلاس سے خطاب بھی کریں گے ، اجلاس میں وزیراعظم پر اعتماد کی تحریک کامیاب بنانے کی حکمت عملی پر غور ہو گا ، اس کے علاوہ وزیراعظم موجودہ صورتحال پر حکومتی و اتحادی ارکان کو اعتماد میں لیں گے ، وزیراعظم سینیٹ الیکشن میں عبدالحفیظ شیخ کی شکست پر بھی بات کریں گے ۔
خیال رہے کہ اس سے قبل ایم کیو ایم کے وفد نے وزیراعظم عمران خان سے ملاقات میں اُن کی بھر پور حمایت کا اعلان کیا ہے ، ایم کیو ایم وفد کا کہنا تھا کہا اتحادی ہیں اور اتحادی ہی رہیں گے ، ہمارے تمام اراکین قومی اسمبلی آپ کو ووٹ دیں گے ۔
ملاقات میں ایم کیو ایم کے وفد نے مزید کہا کہ ہماری کوئی ڈیمانڈ نہیں بس کراچی اور سندھ میں مشاورت میں شامل کیا جائے ۔ بلدیاتی نظام میں اختیارات کی نچلی سطح تک منتقلی چاہتے ہیں ۔ انہوں نے کہا کہ موجودہ گورننس نظام پر تحفظات ہیں مگر وزیراعظم کے ساتھ ہیں ۔
ایم کیو ایم وفد نے کہا کہ یقین ہے عمران خان نہ خود کرپشن کرتے ہیں نہ اسے پسند کرتے ہیں ، نظام میں تبدیلی چاہتے ہیں تاکہ عوام کو ڈلیور کرسکیں ۔
وزیراعظم عمران خان کا حمایت پر ایم کیو ایم سے اظہار تشکر ، ملاقات میں وزیراعظم نے سندھ کے امور میں متحدہ سے مشاورت کی یقین دہانی کرائی ۔ انہوں نے ایم کیو ایم وفد کی تجاویز کو سراہا ۔
عمران خان نے کہا کہ میرا مقصد اقتدار نہیں ، عوام کی فلاح ہے ۔ شفاف نظام کی تبدیلی کے لیے کوشش کر رہا ہوں ، اداروں میں شفافیت یقینی بنانے کے لیے جدوجہد جاری رہے گی ۔