اسلام آباد: وزیر خارجہ شاہ محمود قریشی نے کہا کہ موجودہ حکومت پاکستان کو ترقی کی راہ پر گامزن کرنے کیلئے پُرعزم ہے ، پاکستان امن و استحکام ، ترقیاتی ، شراکت داری اور باہمی روابط کو فروغ دینے کی پالیسیوں پر عمل پیرا ہے ۔
شاہ محمود قریشی کا یوم مارچ کے حوالے سے پیغام ، کہا 23 مارچ کا دن قوم کیلئے ایک اہم سنگ میل کی حیثیت رکھتا ہے ۔ اس روز ہم آزاد وطن کے حصول کیلئے اپنے آباؤ اجداد کی قربانیوں کی یاد تازہ کرتے ہیں ۔ اس روز ہم قائداعظم سمیت تمام قائدین ، شہدا اور اپنے ہیروز کو خراج تحسین پیش کرتے ہیں ۔
انہوں نے کہا کہ قرارداد پاکستان ہماری قومی اور تاریخی امنگوں کی عکاس ہے ، یہ دن موقع فراہم کرتا ہے کہ ہم ملک کو حقیقی فلاحی ، ترقی پسند ، خوشحال ریاست بنانے کے عزم کی تجدید کریں ۔
وزیر خارجہ نے کہا کہ پاکستان وبا کو مکمل شکست دینے کیلئے زیادہ سے زیادہ عالمی سطح پر تعاون کی ضرورت پر زور دیتا ہے ، پاکستانی قوم نے وبا کا مقابلہ کرنے کیلئے بڑی ذمہ داری کا مظاہرہ کیا ۔
انہوں نے کہا کہ وبا سے عالمی معیشت کی طرح پاکستان کو معاشی مشکلات کا سامنا ہے ، وبا کے باعث مشکل فیصلے کرنا پڑے ۔
شاہ محمود قریشی نے کہا کہ پاکستان نے بحثیت قوم پاک افواج کے ساتھ مل کر دہشت گردی کا بھرپور مقابلہ کیا ، پوری قوم دہشت گردی کیخلاف جنگ میں مسلح افواج کے ساتھ کھڑی رہی ۔ قوم اور مسلح افواج کی کوششوں اور قربانیوں سے آج پاکستان پُرامن ہے ۔