اسلام آباد: گزشتہ روز مولانا فضل الرحمان کی جانب سے لانگ مارچ کو ملتوی کئے جانے اور پی ڈی ایم میں اختلافات کے بعد حکومتی وزیر فواد چودھری نے اپوزیشن کو بات چیت کرنے کی دعوت دے دی ہے۔
تفصیلات کے مطابق وفاقی وزیر برائے سائنس و ٹیکنالوجی فواد چودھری نے کہا کہ اپوزیشن اتحاد کا لانگ مارچ کے فیصلے سے پیچھے ہٹنا اچھی بات ہے ۔
سیاسی استحکام ملک کی ضرورت ہے، اچھی بات ہے اپوزیشن لانگ مارچ سے پیچھے ہٹی ہے، پارلیمان میں ایک قدم آگے بڑھیں اور انتخابی اصلاحات سے بات چیت کا آغاز کریں، نئے الیکشن قوانین اور الیکشن کمیشن کی تشکیل کرتے ہیں عدالتی اور انتظامی اصلاحات وقت کی ضرورت ہیں اپوزیشن تجاویز دے
— Ch Fawad Hussain (@fawadchaudhry) March 17, 2021
یہ بات فواد چودھری نے سماجی رابطے کی ویب سائٹ ٹوئٹر پر پیغام جاری کرتے ہوئے کی اور مزید لکھا کہ ملک میں سیاسی استحکام کی ضرورت ہے اور یہ اچھی بات ہے کہ اپوزیشن لانگ مارچ سے پیچھے ہٹ گئی ہے۔
اپنے ٹوئٹ میں فواد چودھری کا مزید کہنا تھا کہ اپوزیشن انتخابی اصلاحات سے بات چیت کا آغاز کرتے ہوئے پارلیمان میں ایک قدم آگے بڑھیں جبکہ نئے الیکشن قوانین اور الیکشن کمیشن کی تشکیل کرتے ہیں اور عدالتی ،انتظامی اصلاحات وقت کی ضرورت ہیں جس کیلئے اپوزیشن تجاویز دے۔