پی ڈی ایم اجلاس آج،اسمبلیوں سے استعفوں سے متعلق فیصلہ متوقع

اسلام آباد: اپوزیشن اتحاد (پی ڈی ایم) کا ہنگامی اجلاس آج بلایا گیا ہے جس میں فیصلہ کیا جائے گا کہ اسمبلیوں سے استعفے کب دیے جائیں گے۔

تفصیلات کے مطابق پاکستان ڈیمو کریٹک موومنٹ کے سربراہی اجلاس کی میزبانی ن لیگ کررہی ہے جبکہ آئندہ کی حکمت عملی کا بھی فیصلہ کیا جائے گا ،مولانا فضل الرحمان اسمبلیوں سے استعفوں کے شدید حامی ہیں جبکہ پی پی پی فوری استعفوں کی مخالفت کررہی ہے۔

مولانا فضل الرحمان نے کہاکہ پارلیمنٹ سے اگر ہم استعفے نہیں دیتے تو لانگ مارچ کی کوئی افادیت نہیں رہے گی جبکہ آج لانگ مارچ کے حوالے سے حکمت عملی طے کی جائے گی۔

پاکستان پیپلز پارٹی کے چیئرمین بلاول بھٹو زرداری نے کہا ہے کہ ہم حکومت کو سیاسی فیصلہ کرکے ہی نقصان پہنچا سکتے ہیں جبکہ پی ڈی ایم اجلاس میں اپنی تجویز بھی لیکر جائیں گے۔

چیئرمین پی پی پی کا مزید کہنا تھا کہ استعفے ایٹم بم ہیں اور یہ کارڈ آخر میں استعمال کریں گے جبکہ دوسری جانب پاکستان مسلم لیگ ن کی نائب صدر مریم نواز نے کہا ہے کہ جو استعفوںپر نہیں مانتے ،اب انہیں منانے کی کوشش کریں گے ۔