اسلام آباد: وزیراعظم عمران خان سے چیئرمین اور ڈپٹی چیئرمین سینیٹ کی ملاقات ، قانون سازی کے عمل کو تیز کرنے اور پارلیمانی امور پر بات چیت ہوئی ۔
عمران خان نے چیئرمین اور ڈپٹی چیئرمین سینٹ کو کامیابی پر مبارکباد دی ۔ ملاقات میں وزیرِ دفاع پرویز خٹک بھی ملاقات میں موجود تھے ۔
اس موقع پر گفتگو کرتے ہوئے عمران خان نے ہدایت کی کہ عوامی فلاح وبہبود کیلئے مؤثر قانون سازی کی جائے ۔ انہوں نے کہا کہ ایوان بالا میں صوبہ بلوچستان اور سابقہ قبائلی علاقوں سے تعلق رکھنے والے رہنماؤں کی سربراہی نہ صرف ان علاقوں کے عوام کے لئے اعزاز کی بات ہے جنہیں ماضی میں نظر انداز کیا جاتا رہا بلکہ یہ وفاق کی مزید مضبوطی کا باعث ثابت ہوگا ۔
انہوں نے امید ظاہر کی کہ چئیرمین سینٹ اپنے دوسرے دور میں ایوان بالا کی ذمہ داریاں اسی احسن طریقے سے ادا کرتے رہیں گے جس خوش اسلوبی سے ماضی میں انہوں نے اپنی ذمہ داریاں سرانجام دیں ۔
وزیرِ اعظم کا چئیرمین اور ڈپٹی چئیرمین سینٹ کے لئے نیک خواہشات کا اظہار ۔