اسلام آباد: چیئرمین پیپلز پارٹی بلاول بھٹو زرداری نے کہا کہ پی ڈی ایم ووٹوں پر ڈاکا ڈالنے والوں کا بھرپور مقابلہ کرے گی ۔
اپنے پیغام میں بلاول بھٹو نے کہا کہ ووٹ پر ڈاکا پارلیمنٹ کے اندر اور باہر ہر فورم پر چیلنج کیا جائے گا ، پیپلز پارٹی کو کمزور نہ سمجھا جائے ۔
خیال رہے کہ پیپلز پارٹی نے مسترد شدہ ووٹ کا معاملہ پیر کو اسلام آباد ہائی کورٹ میں چیلنج کرنے کا فیصلہ کر لیا جس کے لیے پیپلز پارٹی نے فاروق ایچ نائیک ، نیر بخاری ، لطیف کھوسہ پر مشتمل قانونی ٹیم بنا دی ۔
دوسری جانب پی ڈی ایم کا ہنگامی اجلاس پیر کو اسلام آباد میں طلب کر لیا گیا ہے اجلاس میں تمام سیاسی جماعتوں کے سربراہان شرکت کریں گے ۔
میڈیا رپورٹ کے مطابق اجلاس میں ملک کی سیاسی صورت حال پر مشاورت کی جائے گی ، چیئرمین اور ڈپٹی چیئرمین کے الیکشن میں 7 ووٹ کیسے مسترد ہوئے ، قائدین کو اعتماد میں لیا جائے گا ۔
اس کے علاوہ اجلاس میں ڈپٹی چیئرمین کو کم ووٹ ملنے پر بھی جے یو آئی کے تحفظات دور کیے جائیں گے ۔
پی ڈی ایم ذرائع کا کہنا ہے کہ اجلاس میں 26 مارچ کے لانگ مارچ کی حکمت عملی کو بھی حتمی شکل دی جائے گی ، اجلاس میں چیئرمین اور ڈپٹی چیئرمین سینیٹ انتخاب میں شکست پر تمام جماعتیں اپنی رپورٹ بھی پیش کریں گی ۔
اس سے قبل سابق وزیر اعظم نواز شریف اور سابق صدر آصف علی زرداری نے پی ڈی ایم کے سربراہ مولانا فضل الرحمان سے ٹیلی فون پر رابطہ کیا تھا اور چیئرمین سینیٹ اور ڈپٹی چیئرمین سینیٹ کے انتخاب میں یوسف رضا گیلانی اور عبدالغفور حیدری کی شکست پر تشویش کا اظہار کیا تھا ۔
اس کے علاوہ تینوں رہنماؤں نے مسترد ہونے والے 7 ووٹوں کی حقیقیت کو بھی سامنے لانے کے عزم کا اظہار کیا ۔