اسلام آباد: وفاقی وزیر پرویز خٹک نے کہا کہ حکومت نے جے یو آئی ف کو ڈپٹی چیئرمین سینیٹ کی آفر کر دی ہے جبکہ مولانا عبدالغفور حیدری نے حکومت کی آفر کی تردید کر دی ہے ۔
تفصیلات کے مطابق چیئرمین سینیٹ صادق سنجرانی اور پرویز خٹک کی مولانا عبدالغفور حیدری سے ملاقات ہوئی جس میں انہوں نے عبدالغفور حیدری کو آفر کی ہے کہ وہ سینیٹ الیکشن میں تحریک انصاف کی جانب سے ڈپٹی چیئرمین سینیٹ بن جائیں ۔
وزیر دفاع پرویز خٹک کی مولانا عبدالغفور حیدری سے ملاقات کے بعد مختصر گفتگو میں بتایا کہ ہم نے عبدالغفور حیدری کو آفر کی ہے کہ ہمارے ڈپٹی چیئرمین سینیٹ بن جائیں ۔
میڈیا سے گفتگو کے دوران جے یو آئی ف کے سیکرٹری جنرل مولانا عبدالغفور حیدری نے کہا کہ صادق سنجرانی ہمارے چیئرمین ہیں ، ان سے ملاقات ہوتی رہتی ہے ، میں یہ کہہ نہیں سکتا کہ 12 مارچ کے بعد چیئرمین سینیٹ کون ہوگا ۔
انہوں نے کہا کہ پی ڈی ایم میں بھر پور اتحاد ہے اور جو فیصلہ پی ڈی ایم اجلاس میں ہو گا اُس پر عمل کیا جائے گا ۔
واضح رہے کہ پی ڈی ایم کی جانب سے باضابطہ طور پر جمعیت علمائے اسلام کے مرکزی رہنما مولانا عبدالغفور حیدری کو ڈپٹی چیئرمین سینیٹ کے عہدے کیلئے نامزد کر دیا گیا ہے ۔