اسلام آباد: وفاقی وزیر داخلہ شیخ رشید نے کہا ہے کہ ملک میں دوبارہ دہشتگرد منظم ہو رہے ہیں ، پولیس نے جانوں کا نذرانہ پیش کرکے امن کی فضا قائم کی ۔
میڈیا سے گفتگو کرتے ہوئے شیخ رشید نے کہا کہ پولیس اور فوج امن و امان قائم کرتی ہے ، کل افواج نے 5 دہشت گردوں کو ہلاک کیا ہے ، سیکیورٹی فورسز نے شہادتوں سے دہشتگردی کا مقابلہ کیا ۔
وفاقی وزیر داخلہ نے کہا کہ دہشت گرد شکست کھائیں گے اور ملک میں امن و سکون کی فضا قائم ہوگی ۔
انہوں نے اپوزیشن کو سیاسی سرگرمیاں محدود کرنے کا اشارہ کرتے ہوئے کہا کہ ملک میں کالعدم ٹی ٹی پی دوبارہ افغانستان سے منظم ہو رہی ہے ، پولیس نے جانوں کا نذرانہ پیش کرکے امن کی فضا قائم کی ، کل بھی افواج پاکستان نے پانچ دہشت گردوں کو جہنم واصل کیا ۔
پی ٹی آئی اور ن لیگ میں تصادم کے واقعے کا حوالہ دیتے ہوئے شیخ رشید نے کہا کہ پارلیمنٹ ہاؤس کے باہر جو کچھ ہوا بُرا ہوا ، انہوں نے لیگی رہنماؤں کو قصور وار ٹھہراتے ہوئے کہا کہ جہاں پریس کانفرنس کی جگہ ہے اُن کو وہیں رہنا چاہئے تھا ۔
وفاقی وزیر نے بتایا کہ پارلیمنٹ کے باہر واقعہ پر فوری آئی جی سے رابطہ کیا اور رپورٹ بھی طلب کی ۔