اسلام آباد: سینیٹ الیکشن جیتنے کیلئے وزیراعظم عمران خان نے بھی کمر کس لی ، پنجاب سے تعلق رکھنے والے ارکان اسمبلی کے علاوہ لال چند ، شنیلہ رتھ اور ڈاکٹر رمیش کمار سے بھی ملاقات کی ۔
وزیر اعظم آفس کے مطابق وزیراعظم عمران خان سے ممبران قومی اسمبلی کی ملاقات ہوئی جس میں وزیرخارجہ شاہ محمود قریشی ، وزیراعلیٰ پنجاب عثمان بزدار اور عبدالحفیظ شیخ بھی موجود تھے ، ملاقات میں سینیٹ انتخابات کے حوالے سے حکمت عملی پر غور کیا گیا ۔
اس موقع پر عبدالحفیظ شیخ نے حکومتی اتحادی ارکان سے ملاقاتوں بارے وزیراعظم کو آگاہ کیا ، جس پر وزیراعظم نے کہا کہ نمائندوں کی جانب سے اٹھائے گئے عوامی مسائل حل کریں گے ، انہوں نے کہا کہ پہلی بار پسماندہ علاقوں کو زیادہ ترقیاتی منصوبے دیئے جا رہے ہیں ، حکومت کی ترجیح عام آدمی اور پسماندہ علاقے ہیں ۔
عمران خان نے کہا کہ اپوزیشن سینیٹ الیکشن جیتنے کیلئے ہر حربہ استعمال کر رہی ہے ، شفاف انتخابات کیلئے اوپن ووٹنگ کا حامی تھا ، اراکین سے رابطے ہو رہے ہیں مگر ہم متحد ہیں ۔ انہوں نے کہا کہ اپوزیشن کے پیسے اور لالچ کے باوجود سینیٹ الیکشن میں کامیاب ہوں گے ۔
سینیٹ الیکشن میں ایک دن باقی ، تحریک انصاف کے ارکان پارلیمنٹ بھی سرگرم ، سینیٹر فیصل جاوید نے وزیراعظم عمران خان کی ویڈیو جاری کر دی ، ویڈیو میں وزیراعظم عمران خان کا جیت کے لیے عزم کا اظہار ۔ کئی سال پرانی ویڈیو میں عمران خان اپنے مخالف کو ہرانے کی تراکیب بتا رہے ہیں ۔
فیصل جاوید نے کہا کہ اپنا انجام دیکھ کر پی ڈی ایم کیمپ میں خوف و ہراس عیاں ہے ، پی ڈی ایم والے اسلام آباد سے امیدوار کھڑا کرنے پر پچھتائیں گے ۔ انہوں نے کہا کہ انشاءاللہ فتح پی ٹی آئی اور اس کے اتحادیوں کی ہو گی ۔