اسلام آباد: وفاقی وزیر اطلاعات سینیٹر شبلی فراز کا کہنا ہے کہ وزیراعظم عمران خان کل شام 4 بجے عوام سے ٹیلیفون پر براہ راست بات کرکے اُن کی شکایات سن کر اُن کو حل بھی کریں گے۔
شبلی فراز نے اپنے ٹویٹر پیغام میں کہا ہے کہ وزیر اعظم پاکستانی عوام کے سوالات کے جوابات دیں گے، وفاقی وزیر نے کہا کہ ٹیلی فون لائنز شام 4 بجے عوام کیلئے کھول دی جائیں گی۔
یکم فروری بروز پیر شام ۴ بجے وزیراعظم پاکستان عمران خان عوام سے ٹیلیفون پر بذات خود بات کریں گے pic.twitter.com/YT05M4cmlc
— Senator Shibli Faraz (@shiblifaraz) January 31, 2021
خیال رہے کہ اس سے قبل وزیراعظم عمران خان نے اپنی ٹویٹ میں کہا کہ معاشی ٹیم کو مزید متحرک کر دیا تاکہ ملک میں مہنگائی کو کنٹرول کیا جا سکے۔ انہوں نے اپنے پیغام میں مزید کہا کہ معاشی میدان میں مزید خوشخبریاں آرہی ہیں ، افراط زر کم کرنے کی کوششیں اب نتائج دکھا رہی ہیں۔ کنزیومر پرائس انڈیکس اور افراط زر ہماری حکومت بننے سے پہلے کی سطح سے نیچے آ گئے۔
ادھر عمران خان کے بعد وفاقی وزیر منصوبہ بندی اسد عمر نے بھی مہنگائی میں مسلسل کمی کی بات کی ، انہوں نے کہا کہ جنوری میں مہنگائی کی شرح کم ہو کر 5.7 فیصد ہے۔
وفاقی وزیر نے کہا کہ آج مہنگائی کی شرح پی ٹی آئی حکومت کے اقتدار میں آنے کے وقت سے کم ہے۔
خیال رہے کہ ملک میں اشیائے ضرورت کہیں مہنگی تو کہیں قیمتیں معمول پر آنے لگیں ہیں۔ لاہور کی اوپن مارکٹس میں دکانداروں کی من مانیاں ، سبزیوں اور پھلوں کی قمیت میں پانچ فیصد اضافہ ہوگیا۔ جبکہ ماڈل بازاروں میں ریٹس میں کمی پر شہری خوش ہیں۔