لاہور:(این پی جی میڈیا) پاکستان مسلم لیگ ق کے رہنما اور سپیکر پنجاب اسمبلی پرویز الہی نے نجی ٹی وی کے پروگرام میں انکشاف کیا ہے کہ پاکستان تحریک انصاف کے 10 سے 12 ایم این اے اپوزیشن نے چھپا رکھے ہیں۔
تفصیلات کے مطابق پرویز الہی نے نجی ٹی وی پر انٹرویو کے دوران کہا ہے کہ پنجاب کی وزارت اعلی کے لیے اپوزیشن نے پیشکش کی ہے، ان کا مزید کہنا تھا کہ پاکستان تحریک انصاف کے اندر ہی ترین گروپ مائنس بزدار کی باتیں کر رہا ہے۔
پرویز الہی نے ایک سوال کے جواب میں کہا کہ وزیر داخلہ شیخ رشید کو وزیر اعظم عمران خان کو مشورہ دینا چاہیے کہ تصادم سے نقصان ہو گا اور اسلام آباد میں اپوزیشن اور حکومت کی جانب سے جلسے کرنے سے ظاہر ہو رہا ہے کہ ملک تصادم کی طرف جا رہا ہے۔