اسلام آباد (این پی جی میڈیا) وفاقی وزیر تعلیم شفقت محمود نے امتحانات کے انعقاد کا اعلان کرنے کے بعد یونیورسٹیوں کو کھولنے سے متعلق بڑا اعلان کردیا ۔
مائیکرو بلاگنگ ویب سائٹ ٹوئٹر پر انہوں نے اعلان کیا کہ ملک بھر میں تمام یونیورسٹیوں کو پیر سے کھولنے کی اجازت ہے ۔اس سے قبل بین الصوبائی وزرائے تعلیم کانفرنس کے بعد میڈیا کو بریفنگ دیتے ہوئے شفقت محمود نے کہا تھاکہ اجلاس میں تمام فیصلے متفقہ طور پر کیے گئے ہیں۔ فیصلہ ہوا ہے کہ امتحانات 24 جون کی بجائے 10 جولائی کے بعد لیے جائیں گے۔ پہلے انٹرمیڈیٹ کے امتحانات ہوں گے اور اس کے بعد میٹرک کے پیپر لیے جائیں گے۔
انہوں نے بتایا کہ نویں اور دسویں جماعت کے اختیاری مضامین اور ریاضی کے پیپر لیے جائیں گے جب کہ گیارہویں اور بارہویں کلاس کے صرف اختیاری مضامین کا امتحان لیا جائے گا۔شفقت محمود کے مطابق تعلیمی بورڈز کو ہدایت کی گئی ہے کہ پرچوں کے درمیان وقفہ زیادہ رکھا جائے تاکہ بچوں کو تیاری کا موقع مل سکے۔