اسلام آباد: (این پی جی میڈیا) کالعدم تحریک لبیک پاکستان پر ملک بھر میں چندہ اکٹھا کرنے پر بھی پابندی عائد کر دی گئی ہے۔
تفصیلات کے مطابق حکومت کی جانب سے تحریک لبیک پاکستان کو کالعدم قرار دیے جانے کے بعد ان کے اثاثے منجمد کرنے اور پارٹی عہدیداروں کے شناختی کارڈ اور پاسپورٹ بلاک کرنے کی کارروائی شروع کرنے کے بعد اب کالعدم تنظیم کے کسی بھی قسم کے چندہ اکٹھا کرنے پر بھی پابندی لگادی گئی ہے۔
وزارت داخلہ شیخ رشید کے مطابق کالعدم جماعت پر کسی بھی قسم کا چندہ لینے پر پابندی عائد ہوگی اور وفاق کی طرف سے کالعدم جماعت پر چندہ اکٹھا کرنے پر پابندی یقینی بنانے کی بھی ہدایت جاری کردی گئی ہے۔
رپورٹ کے مطابق چاروں صوبوں، آزاد کشمیر اور گلگت بلتستان میں کالعدم جماعت پر کڑی نظر رکھی جائے گی تاکہ وہ ایسی کوئی کاروائی سرانجام نہ دے سکیں۔
اس کے علاوہ پولیس کے کاؤنٹر ٹیررازم ڈیپارٹمنٹ کو چندہ اکٹھا کرنے والوں کے خلاف کارروائی کرنے کے سخت احکامات جاری کردیے گئے ہیں۔