اسلام آباد: (این پی جی میڈیا) مسلم لیگ ن کے رہنما احسن اقبال نے موجودہ حکومت کو ہائر ایجوکیشن کمیشن (ایچ ای سی) کی تباہی کا ذمہ دار ٹھہرا دیا ہے۔
تفصیلات کے مطابق ایچ ای سی سے متعلق جاری ہونے والے صدارتی آرڈیننس پر ردعمل کا اظہار کرتے ہوئے احسن اقبال کا کہنا تھا کہ 2013 میں حکومت میں آئے تو ایچ ای سی تباہ حال ملا، ایچ ای سی کا 13 ارب روپے کا بجٹ ن لیگ کی حکومت نے 46 ارب روپے تک بڑھایا۔
مسلم لیگ ن کے رہنما احسن اقبال کا کہنا تھا کہ بدقسمتی سے آج ہماری یونیورسٹیز کو تباہ کیا جا رہا ہے، موجودہ حکومت نے ایچ ای سی کو تباہ کرنے میں کوئی کثر نہیں چھوڑی ہے۔
یاد رہے کہ صدر مملکت کی جانب سے ایچ ای سی سے متعلق جاری آرڈیننس میں کہا گیا ہے کہ چیئرمین ایچ ای سی کی تعیناتی 2 سال جب کہ ارکان کی تعیناتی 4 سال کے لیے ہوگی اور ایچ ای سی کے تمام فیصلے وزارت تعلیم کی منظوری سے کیے جائیں گے۔