لاہور: حکومت پنجاب نے چینی کی قیمت پر قابو پانے کیلئے صوبے بھر میں چینی کی پرچون قیمت مقرر کردی ہے۔
تفصیلات کے مطابق حکومت پنجاب نے صوبے میں چینی کی کمرشل فروخت پر پابندی عائد کردی ہے۔ جس کے مطابق دکانوں پر ایک کلو چینی 85 روپے سے زیادہ میں فروخت نہیں کی جائے گی جبکہ چینی کی ایکس مل قیمت 80 روپے کلو سے زیادہ رکھنے کی اجازت نہیں ہوگی۔
واضح رہے کہ مارکیٹ میں اس وقت ایک کلو چینی کی ایکس مل قیمت 95 روپے ہے اور دکانوں پر چینی 100 روپے کلو میں فروخت کی جارہی ہے۔
یاد رہے کہ وزیراعظم کی زیرصدارت اجلاس میں آج بھارت سے چینی اور کاٹن کی تجارت نہ کرنے کا فیصلہ کیا گیا ہے اس حوالے سے ان کا کہنا تھا کہ مقبوضہ کشمیر کی آئینی صورتحال بحال ہونے تک بھارت سے کسی بھی قسم کی تجارت نہیں کی جائے گی۔