اسلام آباد: وزیراعظم عمران خان نے ملک میں مکمل لاک ڈاؤن کی تجویز مسترد کرتے ہوئے کہا کہ ہم نے توازن کی پالیسی اختیار کرنی ہے تاکہ غریب آدمی اور ملکی معیشت کم سے کم متاثر ہو ۔
تفصیلات کے مطابق این سی او سی کے اجلاس کی صدارت کرتے ہوئے عمران خان نے کہا کہ عالمی وبا کی گزشتہ لہر میں پاکستان میں دو کروڑ افراد کا روزگار متاثر ہوا ان حالات میں حکومت نے احساس ایمرجنسی کیش پروگرام کی مدد سے غریب طبقات کو موثر ریلیف فراہم کیا ۔
وزرائے اعلیٰ اور حکام نے وزیراعظم کو اپنے متعلقہ صوبوں کی صورتحال سے آگاہ کیا ۔ جس پر عمران خان نے ہدایت کی کہ کورونا ایس اوپیز پر عمل درآمد سے متعلق عوام کو متحرک کیا جائے ، ساتھ ہی کورونا ایس او پیز سے متعلق ضلعی انتظامیہ کے موثر کردار کو بھی یقینی بنایا جائے ۔
واضح رہے کہ وزیراعظم عمران خان کی صدارت میں این سی او سی کا اہم اجلاس ہوا جس میں تمام صوبوں کے وزرائے اعلیٰ اور حکام نے شرکت کی ۔ اجلاس میں پاکستان میں مکمل لاک ڈاون نہ کرنے پر اتفاق کیا گیا جبکہ ملک بھر میں ماسک کے استعمال کی مہم چلانے کا فیصلہ بھی کیا گیا ۔