اسلام آباد: وزیراعظم عمران خان کی بنگلا دیش کے 50 ویں یوم آزادی پر ہم منصب شیخ حسینہ کو مبارکباد ، عمران خان کی شیخ حسینہ واجد کو دورہ پاکستان کی دعوت ۔
تفصیلات کے مطابق اپنے پیغام میں عمران خان نے کہا کہ پاکستان بنگلا دیش کے ساتھ اپنے برادرانہ تعلقات کو بہت اہمیت دیتا ہے ، انہوں نے مزید کہا کہ یہ تعلقات خطے میں پائیدار امن ، سیکیورٹی اور خوشحالی کے فروغ پر قائم ہیں ۔
وزیراعظم نے کہا کہ بنگلا دیش کے ساتھ تعلقات کو مضبوط کرنے کے خواہاں ہیں ، سمجھتے ہیں دونوں ملکوں کے عوام کی منازل ایک دوسرے سے جڑی ہوئی ہے ۔ انہوں نے کہا کہ بنگلا دیشی وزیراعظم کے دورہ پاکستان سے برادرانہ تعلقات کا نیا باب کھلے گا ۔
دوسری جانب بنگلہ دیش کے یوم آزادی کے موقعہ پر بھارتی وزیراعظم نریندر مووی کی بنگلہ دیش آمد پر ہزاروں افراد سڑکوں پر نکل آئے ، جن کا کہنا تھا کہ بنگلہ دیش کے یوم آزادی کے جشن پر مودی کو حصہ نہ بنایا جائے ۔
خیال رہے کہ مظاہرین نے گو بیک مودی کے بینرز تھام رکھے تھے ، احتجاج سے روکنے پر مظاہرین نے سکیورٹی فورسسز پر پتھراؤ کیا جس کے نتیجے میں 4 سکیورٹی اہلکاروں سمیت 40 سے زائد مظاہرین زخمی ہو گئے ، پولیس نے 33 افراد کو حراست میں لے لیا ۔