لاہور: (این پی جی میڈیا) لاہور کی کوٹ لکھپت جیل میں مسلم لیگ ن کے صدر شہباز شریف نے کورونا وائرس سے بچاؤ کی ویکسین لگوا لی ہے۔
تفصیلات کے مطابق شہباز شریف کو کوٹ لکھپت جیل میں کورونا ویکسین کی پہلی ڈوز لگا دی گئی ہے۔
زرائع کا کہنا ہے کہ شہباز شریف نے جناح اسپتال کے ایم ایس کی نگرانی میں کورونا سے بچاؤ کی پہلی خوراک لی ہے۔
خیال رہے کہ گذشتہ روز پاکستان مسلم لیگ ن کے صدر اور قومی اسمبلی میں اپوزیشن لیڈر میاں شہباز شریف کی کورونا ویکسین لگوانے کی استدعا احتساب عدالت نے منظور کرلی تھی۔
عدالت نے ایڈیشنل چیف سیکریٹری داخلہ کو دو دن میں شہباز شریف کو کورونا ویکسین لگانے کا حکم دیا تھا۔
اس سے قبل شہباز شریف نے استدعا کی تھی کہ میری رواں سال عمر 70 سال ہوجائے گی،عدالت ایڈیشنل چیف سیکریٹری داخلہ کو ہدایت دے کہ مجھے کورونا ویکسین لگوائی جائے۔
مسلم لیگ ن کے صدر اور سابق وزیر اعلیٰ پنجاب شہباز شریف منی لانڈرنگ کیس میں گرفتار ہیں۔
خیال رہے کہ وزیر اعظم عمران خان، صدر مملکت ڈاکٹر عارف علوی، وزیر داخلہ شیخ رشید، وزیر تعلیم شفقت محمود سمیت متعدد شخصیات نے کورونا ویکسین لگوائی ہے۔