اسلام آباد: چیئرمین سینیٹ الیکشن سے متعلق یوسف رضا گیلانی کی درخواست مسترد ، اسلام آباد ہائی کورٹ کے چیف جسٹس اطہر من اللہ نے فیصلہ جاری کر دیا ۔
واضح رہے کہ چیف جسٹس اطہر من اللہ نے درخواست کے قابل سماعت ہونے یا نہ ہونے پر محفوظ فیصلہ سنا دیا ، عدالت نے یوسف رضا گیلانی کے وکیل فاروق ایچ نائیک کے دلائل کے بعد فیصلہ محفوظ کیا تھا ۔
فیصلے میں کہا گیا ہے کہ درخواست قابل سماعت نہیں ہے ، توقع ہے منتخب نمائندے اور سیاسی قیادت عدالت کو ملوث کیے بغیر تنازعات حل کرنیکی کوشش کرینگے ۔
آئین میں دیے اختیارات ، استحقاق کا استعمال کرتے ہوئے سیاسی قیادت تنازعات کو حل کرے ۔ یہ عدالت پارلیمان کے استحقاق سے متعلق آئین کے آرٹیکل 69 کے تحت تحمل کا مظاہرہ کر رہی ہے ۔
عدالت نے کہا کہ درخواستگزار کیمطابق پی ڈی ایم کے پاس چیئرمین سینیٹ کیلئے اکثریت موجود ہے ۔ اکثریت ہے تو پی ڈی ایم نہ صرف چیئرمین سینیٹ کو ہٹا سکتی ہے بلکہ گیلانی کو چیئرمین بنا بھی سکتی ہے ۔ فیصلے میں مزید کہا گیا کہ ارکان سینیٹ کا یہ طریقہ استعمال کرنے سے پارلیمان کی عزت اور خودمختاری میں اضافہ ہوگا ۔ اس کے علاوہ آئینی طریقہ کار کے استعمال سے واضح ہوجائیگا کہ ان 7 سینیٹرز نے آپ کو ووٹ دیا تھا ۔