لاہور: پاکستان مسلم لیگ ن کی نائب صدر مریم نواز کی 26 مارچ کو نیب پیشی کا معاملہ ، پنجاب حکومت کی نیب آفس کو ریڈزون قرار دینے کی منظوری ۔
تفصیلات کے مطابق پنجاب حکومت نے نیب لاہور کی درخواست منظور کرتے ہوئے 25 اور 26 مارچ کو نیب آفس کے اطراف رینجرز ، پولیس تعیناتی کی منظوری دیدی ۔ پنجاب حکومت نے رینجرز کی خدمات کیلئے وزارت داخلہ کو خط لکھ دیا ۔
اس حوالے سے وزیر قانون پنجاب راجہ بشارت نے کہا کہ کسی کو قانون ہاتھ میں لینے کی اجازت نہیں دیں گے ، امن وامان کی صورتحال خراب کرنے والوں کیخلاف کارروائی ہوگی ، انہوں نے کہا کہ عالمی وبا کے ایس او پیز کی خلاف ورزی کی اجازت نہیں دی جاسکتی ۔
دوسری جانب وزیر جیل خانہ جات پنجاب فیاض الحسن چوہان نے کہا کہ 26 مارچ کو نیب پیشی پر لشکر کشی کا اعلان قابل مذمت ہے ، انہوں نے کہا کہ تفتیش میں رکاوٹ ڈالنا قابل دست اندازی جرم ہے ۔ رکاوٹ ڈالنے والے کو نیب 10 سال تک قید بامشقت کی سزا سنا سکتا ہے ۔
صوبائی وزیر نے کہا کہ نوٹس کو سیاسی انتقام کا نام دینا قابل اعتراض روایت ہے ۔ مریم صفدر اوچھے ہتھکنڈوں پر اتر آئی ہیں ۔