اسلام آباد: موسم نے پھر سے انگڑائی لی ہے اور جاتی سردی واپس آتی معلوم ہونے لگی ہے، محکمہ موسمیات کے مطابق ملک کے بہشتر شہروں میں بارش کا امکان ہے۔
تفصیلات کے مطابق محکمہ موسمیات کی جانب سے ملک کے بالائی علاقوں میں چند مقامات پر ہلکی بارش اور پہاڑوں پر برفباری کی پیشگوئی کی گئی ہے۔
محکمہ موسمیات کا کہنا ہے کہ ملک میں آئندہ 24گھنٹوں کے دوران خیبر پختونخوا، گلگت بلتستان اور کشمیرمیں مطلع جزوی ابر آلود رہنے کا امکان ہے۔
جبکہ بالائی خیبر پختونخوا اور گلگت بلتستان میں چند مقا مات پر ہلکی بارش کی بھی پیشگوئی کی گئی ہے۔
محکمہ موسمیات کی پیشگوئی کے مطابق پنجاب کے متعدد میدانی علاقوں میں دھند چھائی رہے گی جس سے خنکی میں مزید اضافہ ہوگا۔
جبکہ ملک کے دیگر علاقوں میں موسم سرد اور خشک رہے گا۔
اسکے علاوہ محکمہ موسمیات نے جو تازہ پیشگوئی کی ہے اسکے مطابق شمال مشرقی پنجاب میں آج بھی شدید ترین دھند کا راج برقرار ہے۔
وفاقی دارالحکومت اسلام آباد میں آج صبح مطلع صاف رہا تاہم خنکی میں اضافہ ریکارڈ کیا گیا ہے۔
کراچی میں صبح کے وقت درجہ حرارت 18 ڈگری سینٹی گریڈ ریکارڈ کیا گیا اور شہر کا موسم جزوی ابر آلود رہے گا۔