لاہور (راحیل یاسین) پاکستان کرکٹ بورڈ (پی سی بی) کے چیئرمین محسن نقوی نے کہا ہے کہ آسٹریلیا اور زمبابوے کے خلاف وائٹ بال سیریز میں کامیابی کیلئے ٹیم میں اتحاد ہونا بہت ضروری ہے۔
پی سی بی کے سربراہ نے اس بات کا اظہار نئے مقرر کردہ ٹی ٹوئنٹی اور ون ڈے کپتان محمد رضوان اور نائب کپتان سلمان علی آغا سے ملاقات کے دوران کیا۔ انہوں نے اس بات پر زور دیا کہ متحد ہوکر کھیلنا اور آخری گیند تک لڑنا ہی کامیابی کی کنجی ہے۔ انہوں نے زور دے کر کہا کہ اگر ٹیم ہم آہنگی کے ساتھ کارکردگی کا مظاہرہ کرے تو انہیں کوئی شکست نہیں دے سکتا۔
محسن نقوی نے کہا کہ قوم کو آسٹریلیا اور زمبابوے سیریز کے دوران نئے کپتان کی قیادت میں ٹیم سے اچھی کارکردگی کی توقع ہے۔ انہوں نے اس بات پر روشنی ڈالی کہ پاکستانی ٹیم باصلاحیت پیشہ ور افراد پر مشتمل ہے اور اس اعتماد کا اظہار کیا کہ ٹیم آئندہ سیریز میں بہترین کارکردگی کا مظاہرہ کرے گی۔
انہوں نے ملاقات کے دوران رضوان اور آغا کو بتایا کہ وائٹ بال ٹیم کی قیادت ایک اعزاز کی بات ہے۔ انہوں نے ٹیم کے لیے نیک خواہشات کا اظہار کیا۔
پی سی بی کے چیئرمین نے رضوان اور آغا پر اعتماد کا اظہار کیا۔ اس موقع پر کپتان نے کہا کہ دورہ آسٹریلیا اور زمبابوے کے دوران شاندار پرفارمنس دینے کے لیے پرعزم ہیں اور قوم کی توقعات پر پورا اترنے کی کوشش کریں گے۔
پی سی بی کے چیف آپریٹنگ آفیسر سلمان ناصر بھی ملاقات میں موجود تھے۔
پاکستانی کپتان اور ٹیم کے دیگر کھلاڑی آج 29 اکتوبر کو آسٹریلیا کے لیے روانہ ہوں گے۔